Laudioko jaietako egitarauaren berri emateko oraindik goiz bada ere, abuztuaren 15etik 25era bitartean izango diren hainbat kontzertu aurreratu dituzte dagoeneko. El Drogas, Zetak eta Tremenda Jauria taldeek beteko dute programa, beste emanaldi batzuen artean.
Aurten Laudioko Udaleko jaietako sailak, jaietako lantaldearekin elkarlanean, Formula V taldearen alde egin du txupinazoaren egunerako, eta El Drogas-en rock urbanoaren alde abuztuaren 16rako, ostiralerako. "Kontzertuak beti dira gure jaietako ekitaldirik jendetsuenetarikoak, eta aurten danontzako denetarik egon dadin saiatu gara. Jaietako lantaldearekin batera mimo handiz diseinatu dugun programa honekin gure bizilagunak berriro konkistatzea espero dugu", adierazi du Sonia Respaldiza jaietako zinegotziak. Larunbatean, abuztuaren 17an, Gobernantza Feministaren arloak antolatutako kontzertuak izango dira; Burbuilak eta Matx. Baina egun horretan ere Boni M. taldearen disko-musikak Laudio hartuko du.
Bestalde, Tremenda Jauria taldearen aldarrikapen hitzak, eta bere musika folkloriko eta abangoardisten fusioa ere izango dira aurtengo Laudioko Jaietan, hilaren 22an, hain zuzen ere. Peio Reparaz nafarraren puntako taldea, Zetak, hilaren 23an izango da oholtza gainean, baserritarren egunarekin bat eginez. Eta aipatutako taldeez gain, Laudio Atzar Hadi, Tenampas eta Korrontzi ere arituko dira.