SOS Aiaraldea lemapean, apirilaren 10ean, eginiko agerraldian herritarrek zein osasun zentroetako langileek hartu dute hitza. "Kezkatuta" eta "haserre" daudela azaldu dute, eskualdeko osasun sistemak bizi duen egoeragatik. Euren hitzetan, geroz eta gehiago ari da azaleratzen medikuak falta direla larrialdi zerbitzuetan, jendea beste herri batzuetara bideratzen dutela kasu horietan eta, ondorioz, herri horietan "kolapsoa" ematen dela lan karga gehiagarri hori jasotzen dutenean.
Azken egun hauetan eskualdean jazotako gertakariak jarri dituzte horren adibide: "Amurrioko anbulatorioan ez zen medikurik egon martxoaren 27an, 31n eta apirilaren 1ean: eta, horren ondorioz, bi orduko itxaronaldiak sortu ziren Laudion".
"Apirilaren 5ean eta 7an, aldiz, Laudioko Etengabeko Arreta Gunea egon da medikurik gabe". Nabarmendu dutenez, aipatutako kasu horiek ez dira puntualak. Euren ustez, "atzetik datorren arazoa" da, "horrelako gertakariak errepikatuz joan baitira azken urteetan".