Oraindik ikertzen ari diren arrazoiengatik, Teo Zelenyi izeneko 11 urteko ume bat hil zen astearte gauean Artziniegan, Gau Beltzeko ospakizunen testuinguruan. Antza denez, lagunekin mozorrotuta jolasten ari zela, adingabea zerraldo erori zen eta bertan hil zen, bat-batean. Larrialdi zerbitzuak berehala iritsi ziren, eta Gurutzetako ospitalera eraman zuten, baina ezin izan zuten ezer egin umea salbatzeko.
Artziniegako Udalak "doluminak eta elkartasuna" adierazi dio familiari, Elizaveta amari, lagunei eta Arteko Gure Ama ikastetxeko komunitateari, eta hiru dolu egun ezarri ditu udalerrian, osteguneko gauerditik igandeko gauerdira; hau da, azaroaren 2ko 00:00etan hasita hilaren 5eko 00:00etara, ostegunean, ostiralean eta larunbatean. Udaletxeko bandera ofizialak hega erdian egongo dira hiru egun horietan, eta haurrentzako antolatutako jarduera guztiak bertan behera utzi dituzte.
Gainera, ostiralean, 17:30ean, elkarretaratze isila egingo dute Toñin Luengas pilotalekuan.