Trebiñuko Konderrian banatuta dauden hainbat sail oinordetzan jaso ditu Gasteizko Udalak, 200.000 eurorekin batera. San Prudentzio zaharren egoitzan bizi zen emakume batek egoitzari utzi dion herentzia da hori; udal egoitza denez Udalak berak jaso du jaraunspena.
Isabel izena zuen zendutako lagunak, eta oinordeko zuzenak ez zituenez, duela hamar urte inguru erabaki zuen San Prudentzio erresidentziari utziko zizkiola Trebiñun zituen lurrak eta aurreztuta zuen dirua.
Hartara, bost zereal lurzoru jaso ditu Gasteizko Udalak; 8.611,96 euroko balio katastrala dute sail horiek. Halaber, 204.581,32 euro jaso ditu emakumeak kutxa batean zuen fondo batetik, eta beste 4.620 euro bankuko kontu batetik. Gasteizko Udalaren arabera, egun ez da lehen bezain ohikoa udalei herentzia ematea. Izan ere, Gasteizko udal inbentarioan esate baterako, soilik agertzen dira hamaika lursail eta baratza bat. Bestalde, San Prudentzio erresidentziaren lana nabarmendu dute udal agintariek. "Herentzia San Prudentzio zaharren egoitzaren lanaren eta kalitatearen adierazgarria da".