alea.eus

Marrazki eta ilustrazio azokaren bigarren edizioa egingo dute abenduan

Erabiltzailearen aurpegia Daniel Sanz Moreno 2016-12-07 09:00   Kultura

Mazoka abenduaren 16tik 18ra izango da, eta iaz baino egitarau zabalagoa eskainiko du. 

Marrazki eta ilustrazio azokaren bigarren edizioa egingo dute abenduan
Iaz Mazokaren lehen edizioa egin zuten. | Ikusi handiago | Argazki originala

Mazoka Ilustrazio eta Marrazkiaren azoka egingo dute abenduaren 16, 17 eta 18an, Montehermosoko ur-biltegian. Aurtengo egitaraua iazkoa baino zabalagoa izango da. Izan ere, kontzertu eta familientzako lantegiez gain, ekimen berriak antolatuko dituzte. Hala nola, artisten sorkuntzen zozketa, eta Ilustrazioaren lehen Jardunaldi Profesionalak. Antolatzaileen esanetan, ilustrazioaren profesionalentzat zein zaleentzat Gasteiz estatu mailan erreferentzia bihurtzea da jaialdiaren helburua.

Azokaren aurretik, abenduaren 14 eta 15ean, bi ilustrazio erakusketa inauguratuko dituzte, eta  Ilustrazioaren lehen Jardunaldi Profesionalak egingo dira. Orobat, profesionalentzako lantegi bat izango da, bai eta sektorean ospetsuak direnen hitzaldiak eta maisu eskolak.

Egitaraua

IlustrApados en Araba elkarteak antolatzen duen jaialdiaren ekarpen nagusia erakustaldia izango da: sarrera doakoa izango da, eta egileak arduratuko dira ekarritako materiala erakusteaz. 40 ilustratzaile, marrazkilari eta ikusizko artisten lanak bilduko dira azokan, sortzaile hasiberriak zein eskarmentu handikoak. Artista gehienak bertakoak izango dira.

Bestalde, Mazokaren barruan marrazketarekin eta ilustrazioarekin lotutako bestelako jarduerak antolatu dituzte: familientzako lantegiak, zuzeneko erretratuak eta musika emanaldiak. Halaber, umeentzako eremu bat ere egokituko dute, txikiek zein nagusiek marraztu dezaten. Amaitzeko, parte-hartzaileen ilustrazioak eta marrazkiak zozketatuko dira.

 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa