Gazte Sortzaileak bekari esker, Iñaki Landa kazetariak Gasteizko kultura alternatiboan oinarritutako story mapa osatu du. "Ohiko mapak dira oinarrian, baina testu, argazki, bideo edo soinuekin eguneratuak", argitu du Landak. Horretarako, bi lantegi antolatu zituen otsailean, parte-hartzaileekin XXI mendeko mapa osatzeko. Orain lan horren emaitza aurkeztu diete gasteiztarrei, Orainaldian izena hartu berri duen proiektua, hain zuzen ere."Gasteiztarrentzat eta kanpotik datozenentzat badira gozotegien mapak, pintxo ederren mapak, jatetxe eleganteen mapak baina... eta kulturaren mapak?". Abiapuntu horrekin martxan jarri zuen proiektua Landak.
Auzolana, oinarri
Hasieratik argi zeukan Landa auzolanean oinarritutako mapa izango zela. Horretarako story mapen inguruko ikastaroa antolatu zuen Oihaneder Euskararen Etxean eta bertaratu zirenekin, zerrenda "anitza eta zabala" osatu zuten. Besteak beste, hor ageri dira Zuloa, Monstrenka, Baratza, Gero arte, Teantro, Zas, ARTgia edota Sukubo moduko guneak. Baina baita Parral, Gora Project, Herre 74, Black Salad tabernak ere, "tabernak izan arren eurek ematen diotelako benetako bizitza hiriari". Horrez gain, Errekaleor auzoa ageri da, Gasteizko Gaztetxea, Sumendi edota Helldorado edo Orbain moduko kultur elkarteak.
Orainaldian: laissez faire dokumentala
Proiektua gauzatzen ari zirela, Orainaldian: laissez faire egitasmoa bihurtu zen. "Gune ezberdinetako kideekin hitz egiterakoan Gasteizko gazte sortzaile zirenen istorioak kontatzeko daudela konturatu ginen. Kulturaren alorrean emergenteengan, gazteengan arreta gehiago jarri behar dela ulertu genuen eta, besterik gabe, horretara jarri ginen", zehaztu du Landak. Hala, Ginidi Auzmendi dokumentalista eta Mikel Buruagaren laguntzarekin, proiektua dokumetal bilakatuko da. Bertan, Lurburu kolektiboa, Gasteiz Hardcore Crew kolektiboa, Beñat Goitia musikaria, Eider Bernaola argazkilari, Mikel Ktthulu editorea, Paul Urkijo zinegilea, Irantzu Lekue artista, OjodeKuervo eta Frik1 grafitigilearen bizipenak agertuko dira.
Etorkizunera begira, kultura alternatiboaren mapa berri hau telefonoentzako APP bilakatzea dute helburu.
