Lehenengo minutuetako joko parekatuaren ostean, 17 urteko Luka Doncic madrildarrak bere adinerako ezohikoa den ausardia erakutsita jokoaren pisua beregain hartu eta Real Madrilen alde jarri du partida aldageletara bidean (44-35).
Hirugarren laurdenean Sito Alonsoren mutilek ordea erreakzio gaitasuna erakutsi dute eta defentsa gogortuta markagailuan gerturatzea lortu dute. Gasteiztarren minuturik onenak izan dira eta hiruko marratik behin eta berriro asmatuta partidua erabat irauli dute. Partidua bukatzeko 3 minutu eskas falta zirela, Baskoniak zortzi puntuko aldea izan du eta garaipena ia esku artean izan dute.
Real Madrilek ordea ez du amore eman eta gasteiztarren artean jokaldi erabakiorretan zalantzak nagusitu dira. Urduritasunak eraginda baloi ugari galdu dute eta madrildarrek aukera hori baliatuta partidua berdintzea lortu dute Sergio Llulen erasoko jokoari esker.
Luzapenera fisikoki agortuta iritsi dira bi taldeak, baina Baskoniako jokalariek partidua irabazteko fede nahikorik erakutsi ez duten bitartean, Real Madrilekoek sendotasun eta kemen gehiago erakutsita finalerako txartela lortu dute.
Partidu ikusgarria izan da eta bi taldeek joko maila paregabea erakutsi dute, baina lehia horretan madrildarrak izan dira nagusi eta igandeko finalean Gasteizko zaletuek ezin izango dute Baskonia txapeldun bihurtzen ikusi.