Irabazi udal taldeak Elorriagako araztegia Salburuko hezeguneetara isuriak jaurtitzen ari dela salatu du. Izan ere, inguruko bizilagunek salatu bezala, Santo Tomas ibaian eta Hezeguneetan araztu gabeko ura jaurtitzen ari dira. Irabazi taldearen ustez, "udalaren erantzukizuna da egoera honi amaiera ematea eta Eraztun Berdearen kontserbazioa bermatzea".
Irabazik ohartarazi du Elorriagako araztegiak ura garbitzeko erabiltzen duen prozesua "oinarrizkoa" dela: soilik solido handiak kentzeko gai den bakterio-ohantzea baitu .”Euri asko egiten duenean, ura ohantzean sartu eta araztu gabe ateratzen da, eta ur horrek guztia kutsatzen du”. Gauzak horrela, egoera honi aurre egiteko eskatu dio Irabazik Udal Gobernuari. “Biltzaile baten bitartez Elorriagako ur kutsatuak hiriko saneamendu-sarera konektatzeko obrak berehala hastea eskatzen diogu, ondoren, Krispiñako araztegian tratatuak izan daitezen”.