Gasteizko Andre Maria Zuriaren plazan mila lagun inguru protesta egiteko bildu eta bi ordura jakin izan da zorigaiztoko albistea: hil da Alicia, atzo gizon batek leihotik bota zuen 17 hilabeteko ume txikia.
Askatasuna kaleko lehen pisu batetik bota zuen umea atzo goizean D.M. musika irakasle eta saxofoi-joleak, jatorriz sevillarra. Umeari sexu erasoak egin zizkiola aitortu dio Ertzaintzari erasotzaileak, EFE agentziaren arabera. Iturri horiek diotenez, atzo bikotekideak (18 urteko emakume brasildar bat) abusuak egiten harrapatu zuen gizona. Jarraian, erasotzaileak itxita zegoen leiho baten bitartez bota zuen emakumearen haurra. Gurutzetako pediatriako zainketa intentsiboetako unitatera eraman zuten umea, baina gaur iluntzean hil da, garezur eta garun traumatismo larrien ondorioz.
Bi homizidio saio egitea egotzi diote 30 urteko gizonari, emakumea ere jo baitzuen. Ez du Ertzaintzaren aurrean deklaraziorik egin nahi izan. Medikuek ebaluatu bezain laster epailearen aurretik pasako da.