Arabako udaletan izandako hizkuntza-eskubideen bederatzi urraketa jaso ditu Elebidek 2018. urteari buruz aurkeztu berri duen txostenean: bost salaketa Gasteizen, bi Guardian, eta bana Artziniegan eta Iruña Okan. 2017an, berriz, salaketa bakarra jaso zen Arabako toki-administrazioei zegokienez, Gasteizko Udalari zegokiona, hain zuzen. Aldundiari dagokionez, 2018an salaketa bakarra jaso dute. Zehazki, Araba Garapen Agentziak jaso du salaketa hori. 2017an, berriz, lau izan ziren.
Orotara, Euskal Autonomia Erkidegoan 245 intzidentzia jaso dituzte, aurreko urtean baino 101 gutxiago. Erkidego mailako datuei erreparatuz, %83 (153 kexa) esparru publikoan gertatutako urraketak izan ziren, eta %17 (33 kexa), esparru pribatuari lotutakoak. Horietan, ia guzti-guztiak euskaraz aritzeko ezintasunari lotuta doaz, bitan izan ezik: horietan "gaztelania erabiltzeko eskubide-urraketa" salatu dute.
Kexa motari dagokionez, Elebidek lau multzotan sailkatzen ditu: idatzizko harremanak (70 kexa), ahozkoak (45), hizkuntza-paisaia edo errotulazioa (19), eta internet (36). 2018an jasotako 232 intzidentzietatik 219 "itxitzat" eman ditu, "erakunde urratzaileak bidalitako informazioa" birbidali diotelako salaketa jarri duen lagunari edo erakundeari. Ondoren, jasotako erantzunarekin salatzailea ados egon ezean, "irtenbiderik gabeko" modura sailkatzen dute salaketa.