Gasteiztik 30 kilometrora, Lasierra herrian kokatzen den Azala proiektuak 2017ko Gure Arteasaria irabazi du, ikusizko arteen arloan egindako lana aitortzen duen modalitatean. "Azken urteetan, arte testuinguruarentzako erreferente bat izan da Azala", azaldu du Kultura eta Hizkuntza Politika Sailak banatzen dituen sarien epaimahaiak. 2008.urtean Idoia Zabaleta koreografoak abian jarri zuen egitasmoak arte eszenikoak eta dantza lantzen ditu bereziki, baina artearen beste arlo batzuetara zabalduz. Geroztik, bertako zein nazioarteko artistek egonaldiak egiteko, ikasteko, partekatzeko eta esperimentatzeko tokia topatu dute Azalan. Izan ere, guneak sortzaileei eskaintzen dizkien aukerak nabarmendu ditu epaimahaiak. "Leku irekia da, bertan sortze-lanaren edozein fase bizkortu daiteke elkarlanean, partekatu egiten dira artegile guztien sorrera edo ikerketa-prozesuak, eta etengabeko prestakuntzari ere heltzen zaio".
Aurtengo edizioan emakumeak eta emakumeek gidatutako proiektuak saritu dituzte. Azalarekin batera, Maria Luisa Fernandez artistak ibilbideari dagokion Gure Artea saria jaso du. Alaitz Arenazak eta Maria Ibarretxek osatzen duten Sra. Polaroiska kolektiboari, aldiz, sorkuntza-lana aitortu zaio. Bakoitzak 18.000 euro jasoko du.
X. Proklama jaialdia
Datozen egunotan Azalaren proposamenetariko bat ikusteko aukera izango da, oraingoan, Gasteizen. Hamargarrenez arte bizien Proklama jaialdia antolatu du, Artiumekin elkarlanean. Besteak beste, dantza ikuskizunak, hitzaldiak eta ikastaroak egingo dituzte maiatzaren 11an eta 12an, Artiumen eta Arte Ederren museoan.
Egitaraua
Envoltura
Solo pieza zenbaiten aurkezpena: Isabel de Naverán, Idoia Zabaleta, Leonor Leal, Bobote eta Pedro G. Romero
Arte Ederren Museoa (Vitoria-Gasteiz), sartzea gonbidapenaz
Maiatzaren 11n, 19:00etan (Toki mugatua. Gonbidapenak Arte Ederren Museoan eskura daitezke, maiatzaren 11n bertan, 18:00etatik aurrera)
Historia(k)
Dokumentalaren proiekzioa eta Olga de Sotok gidaturiko mintegia
Artium, Plaza aretoa, sarrera doan
Maiatzaren 12an, 10:00etatik 14:00etara
Argibideak eta izen-ematea: proklamar@gmail.com (toki mugatua
Oihana. Txara gizakiak zelatan
Pedro G. Romero-ren hitzaldia
Artium, Emanaldi-aretoa, sarrera doan
Maiatzaren 12an, 18:00etan
BOCA DE FIERRO (burdina-ahoa)
Arte ekintza: Marcela Levi & Lucía Russo, Improvável Produções
Artium, Ekialde-Goikoa aretoa, sarrera doan
Maiatzaren 12an, 20:30ean