Diputatuen Kontseiluak diru-laguntzetarako deialdi berri bat onartu du Arabako Lurralde Historikoko kuadrillek, Gasteizkoa izan ezik, ingurumeneko teknikariak kontrata ditzaten. Horretarako, 100.000 euro emango ditu diru laguntzetan.
“Herritarrek ingurumenari geroz eta begirune handiagoa dioten bizimoduak eskatzen dituzte, eta, gainera, ingurumen arloko araudiaren xedea ere bada ingurumenari geroz eta babes maila handiagoa ematea eta iraunkortasunaren aldeko politika aktiboak ezartzea. Bi xede horiek lortzeko, beharrezkoa da herri administrazioek arlo horretan kualifikatuak diren teknikariak eduki ditzaten”, azaldu dute foru erakundetik ohar baten bidez. Hori dela-eta, Arabako tokiko erakundeei laguntzeko eginkizuna betez, eta EAJk eta BILDUk aurrekontuak onartzeko egindako akordioaren barruan, 2016ko ekitaldirako helburuen artean ezarri du kuadrillei diru-laguntza ematea langile horiez horni daitezen. Arabako Foru Aldundiak ingurumen arloko teknikariak kontratatzeko kostuaren % 80 finantzatuko du, gehienez, eta diru-laguntzen muga izango da 43.080 euro onuraduneko.