Azken 25 urteetan lehenbiziko aldiz bisoi europar bat atzeman dute Izkiko parke naturalean. Basozainek bisoi amerikarraren ugalketa kontrolatzeko jartzen ohi dituzten tranpa batean sartu da animalia gaur goizean, eta bertatik Martiodako animaliak sendatzeko zentrora eraman dute. Identifikatu gabe zegoela ikusi ondoren, odola hartu, mikrotxip batekin identifikatu, eta zegoen errekara itzuli dute.
Munduan desagertzear dauden espezieen artean arrisku gehien duenetarikoa da bisoi europarra. Mustelido hau babestea eta berreskuratzea bilatzen duen Life Lutreola proiektuan parte hartzen du Arabako Foru Aldundiak, eta haren menpe dagoen Martiodako zentroak. Life lutreola ekimenaren sustatzaileek bisoi amerikarra harrapatzeko kutxak jarri dituzte ibai eta erreka bazterretan. Arabako Aldundiko Ingurumen sailak azaldu duenez, iaz 78 bisoi amerikar atzeman zituzten Araban, eta soilik zazpi europar.
