Zabalik daude ostera ere Santa Katalinako lorategi botanikoko ateak, eta turismoa sustatu nahian, jarduera programa erakargarria prestatu du Arabako Diputazioak; besteak beste, bisita gidatua, tailer didaktikoa eta kultura ekitaldiak izango dira datozen hilabeteotan bertan.
Berrikuntzen artean, tximeletategiarekin lotutako ekimenak dira nabarmentzekoak. Uztailean, esaterako, tximeleten gaineko hitzaldia eskainiko du aditu batek gune horretan, eta baita animalia horiek behatzeko saioa ere. Gainera, ikasleen bisitak antolatzeko egutegia prestatzen dabiltza datorren ikasturterako, umeek tokian bertan ikas dezaten espezie horren metamorfosi eta bizitzari buruz jakin beharrekoa.
Tailer didaktikoak ere antolatuko dituzte, gainera, lorategiko denboraldi berriari begira; hain justu, sendabelarren eta tokiko landareen gainekoak izango dira, eta lurrin eta xaboiak artisau erara egiten ere ikasteko aukera izango dute.
Izarrak behatzeko saioak
Izarrak eta konstelazioak behatzeko saioak ere leku berezia izango du. Azpimarratzekoa da Santa Katalinako lorategia Starlight izar parke moduan onartua izan dela, eta ekitaldi nagusi gisa, ilargi festa egingo dute abuztuaren 10ean. Dagoeneko errotuta dagoen festa da hori, urtero milaka lagunek parte hartzen dute baitute antzerkiz lagundutako ibilaldian.
Flamenko eta tango gauak
Horrez gain, askotariko kultura ekitaldiak izango dira datozen hilabeteotan; tartean, flamenko eta tango gauak egingo dituzte, eta Erdi Aroan oinarritutako Enperadorearen bidaia antzezlana eskainiko dute. Gauean pelikula eskainiko dute.
Apirila eta urria bitartean egingo dira aipatutako ekintza guztiak, Arabako Foru Aldundiaren Turismo Sustapenaren sailak eta Lorategi Botanikoaren Adiskideak Elkarteak elkarlanean sinatutako hitzarmenari jarraituz. Hiru ardatz nagusi ditu honako akordioak: tximeletategi berria eta tximeleta lorategia sustatzea, jarduera botanikoa bultzatzea eta lorategia turismo baliabide bezala indartuko duten askotariko jarduerak antolatzea.
Iazko urtean zehar 12.000 lagun baino gehiagok bisitatu zuten Santa Katalina lorategia eta kopuru horrek bisitarien zenbatekoan %25eko hazkundea eragin zuen.
Egutegia
Bakoitzak bere kabuz edo bisita gidatua eginez ikusi daiteke lorategi botanikoa, honako ordutegian: 10:00etatik 14:00etara, astegunetan; eta 11:00etatik 15:00etara, larunbatetan, igandetan eta jaiegunetan. Maiatzetik irailera bitartean, berriz, 10:00etatik 20:00etara egongo da zabalik.