Arabako Foru Aldundiak 1,5 milioi euro inbertituko ditu Langraiz Okara A-3308 errepidetik sartzeko bidea hobetzeko, eta Gasteiztik Langraizera (eta alderantziz) doazen ibilgailuak A-2622 errepide zaharreko bidegurutzean gelditu behar izatea ekiditeko. Martxoan ekingo diete lanei, eta sarbide berria urtea amaitu baino lehen irekiko da zirkulaziorako.
Proiektu horrek gidarientzat segurtasun eta erosotasun handiagoa lortu nahi du, eta proiektuaren barruan biribilgune berri bat egitea aurreikusi da, herriko ikastegi berriaren eta kirol eremuaren parean. Orobat, Subillabideko industrialderako sarbidea hobetu eta Langraizerako ekialdeko sarbidea berrantolatuko du, herri arteko zirkulazioaren eta herri barrukoaren arteko lotunea izango den biribilgune bat dela medio. Errepidearen egokitzea ere jasotzen du proiektuak.
Gaur Diputatuen Kontseiluak proiektua esleitu du, 1,5 milioi euroan eta zazpi hilabeteko gauzatze epearekin, Bide Azpiegituren eta Mugikortasunaren Sailak proposaturik. Horren helburua bikoitza da: bere garaian Langraiz Okako Kontzejuarekin izenpetutako lankidetza hitzarmena betetzea, eta Arabako Errepideen Plan Integralean (AEPI) gurutze gune eta sarbideen berrantolamenduari buruz aurreikusitakoak gauzatzea.