alea.eus

Hegaztiak dira Ibita ikerketa taldeko lehen liburuxkaren protagonistak

Estitxu U. Lopez de Arkaute 2016-11-05 12:00   Ingurumena  Trebiñu  Trebiñu

Andoni Llosa adituak bildutako informazioarekin argitaratu berri dute Trebiñuko Konderriko ohiko hegaztien liburuxka bat.

 

Hegaztiak dira Ibita ikerketa taldeko lehen liburuxkaren protagonistak
Trebiñuko hegaztien inguruko bilduma. | Ikusi handiago | Argazki originala

Txolarrea, enara azpizuria, txantxangorria, kaskabeltza, amilotxa eta zozoa dira Ibita ikerketa taldeak argitaratu duen lehen liburuxkaren protagonistak. Trebiñuko Konderrian, ohiko hegaztiak dira herriko eta baratzetako txoriak.  "Hegaztien babesa eta haiekiko maitasuna sustatu eta zabaldu nahi izan dugu", argitu du Andoni Llosa egileak.

Haren esanetan, liburuxkan ez dira agertzen tokiko hegazti arraroak, udalerrian azaltzen direnak baizik. "Gurean herri guztietan goza ditzakegu, zenbait faktoreren arabera: zenbat eta basoxka, fruta-arbola eta lorategi gehiago, orduan eta txori gehiago ikusiko ditugu". Llosa Ibita institutuko kidea izateaz gainera, aditua da hegaztien alorrean, eta urteak daramatza tokiko txorien jarraipena egiten. Bildutako informazioarekin, eta Ibai Llosa semearen argazkiekin osatu dute liburua, hain zuzen.

Datozen egunetan Trebiñuko Konderriko 47 herritako kafetegitan, dendatan, eta nekazaritza etxetan banatuko dute argitalpena. "Interesa duten herritar guztien artean zabalduko dugu egindako lana", azaldu du Llosak.

Hurrengo egitasmoak

Txoriak, gure auzotarrak liburuxka daIbita Trebiñuko ikerketa taldearen lehen argitalpena, eta asmoa dute gehiago argitaratzeko. Iaz jaio zen Ibita, Trebiñuko Konderriaren inguruko azterketak sustatzeko talde independente bezala, Udalaren babesarekin. Aurten, liburuxkaz gainera, Ibita bekaren deialdia egin dute, eta horren harira Araikoko mendatean, Pozarrate izeneko eremuan, Neolitoko meatzariek ustiatu zuten silex harrobia induskatzeko diru partida eman dute. 

Llosarekin batera, Ricardo Garaik eta Roberto Gonzalez de Viñasprek osatzen dute Ibita taldea. "Asko dago egiteko Trebiñuko Konderrian, naturaren, hizkuntzaren edo historiaren inguruan, eta  txoriena moduko liburu gehiago argitaratu nahi ditugu".

 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa