La Paz espetxetik desagertu zela 80 urte betetzen diren egunean, Isaac Puente mediku anarkista gogoratu du EH Bilduk, Maeztun bere izena duen plazan egindako omenaldi batean. Bertan atxilotu zuten 1936ko uztailaren 28an eta La Paz espetxean zela handik atera eta epaiketarik gabe hil zuten. Mediku anarkista, CNTko militante esanguratsua izan zen eta, besteak beste, El comunismo libertario idatzi zuen. Haren gorpua ez da agertu oraindik.
"Gaur Isaac Puenteren memoria aldarrikatu nahi dugu, eta berarekin batera egun Araban desagertuta jarraitzen duten guztiena. Horrez gain, hildako guztiak, heriotza zigorra aplikatu zieten guztiak eta beste errepresio mota batzuk pairatu zituzten milaka arabarrak", gogoratu du Kike Fernandez de Pinedok, Arabako Batzar Nagusietako EH Bilduko bozeramaileak. Harekin batera, Legebiltzarreko, Batzarretako, Gasteizko eta Maeztuko Udaletako EH Bilduko ordezkariak ere egon dira.
1936ko uztailetik 1945eko apirilera 300 pertsona hil zituen errepresioak eta oraindik zigorrik gabe jarraitzen dute, EH Bilduk gogoratu duenez. Horien artean, Teodoro Olarte eta Teodoro Gonzalez de Zarate, Arabako goi karguak, 1936ko irailaren 17an atxilotu zituzten; Olarte hurrengo egunean fusilatu zuten Mirandan, eta Gonzalez de Zarate Azazetan hilabete batzuk beranduago. Euren lana eta pertsona goratzeko hurrengo egunetan EH Bilduk ekinaldi insituzionalak aurkeztuko dituela iragarri dute.