Gaur goizean Andre Maria Zuriaren XIV. mendeko irudi zaharberritua aurkeztu dute erakundeetako eta Gasteizko elizbarrutiko ordezkariek. San Migel parrokiako eskulturak hirizaina, Andre Maria Zuria, irudikatzen du, eta Andre Maria Zuriaren Kofradiaren zaintzapean dago.
Jatorrizko irudia 2007 urtera arte egon zen San Migel elizako horma-hobian jarrita, eta oso gaizki kontserbatuta zegoen, eguraldiaren eta azken urteetan jasan zituen eraso bandaliko ugarien eraginez. Kofradiak irudia bertatik kentzea eta zaharberritzea erabaki zuen. Horren ordez, 2008. urtean kopia bat jarri zuten San Migeleko horma-hobian. Gaur aurkeztu den jatorrizko irudia Elizbarrutiko Arte Sakratuaren museoan gordeko eta erakutsiko dute. Eskultura bisitatzea dohainik da.