Egunsentian edo iluntzean Gorbeiako magaletara joatea eta orroaldi sasoian oreinek eskaintzen duten ikuskizunarekin gozatzea. Horixe da asteotan lagun ugari egiten ari direna; batzuk banaka joaten dira, eta bakar batzuk, berriz, Arabako Diputazioak antolatu dituen irteeretan.
Hainbat urte pasa dira marrualdian azken bisitak antolatu zirenetik. Garai hartan, lur orotako ibilgailuen bidez igotzen zituzten parte-hartzaileak behatoki natural bateraino. Baina, ibilgailuen edukiera murritza dela onartu du Arabako parke naturaletako zerbitzu zuzendari Fernando Camarak, eta, hortaz, bisita horiek egiteari utzi zioten.
Hamar kilometroko irteerak
Dena dela, Diputazioan jabe dira ikuskizun horrek "gero eta ikusmin gehiago" sortzen duela, eta, aurten, irteera "esperimentalak" antolatzea erabaki dute. Ibilgailuak erabili beharrean, oinez egin dira joan-etorrian zailtasun ertaina duten hamar kilometro inguruko bisitak. Gainera, irteeran zehar Amaiur Ruiz eta Unai Perez de Arriba gidek gaiaren inguruan azalpenak eman dizkiete parte-hartzaileei, eta behatoki naturalean marrualdia hobeto ikusteko teleskopio eta prismatikoak erraztu dizkiete.
Aurten, hiru irteera egin dituzte irailaren 23an eta 30ean, eta urriaren 1ean; bakoitzean 15 lagunek parte hartu dute. Ez dago esan beharrik arrakastatsuak izan direla, jarraian bete dira plaza horiek.
Irakurri erreportaje osoa ALEA aldizkariaren 77. zenbakian. Etxean jasotzeko, harpidetu hemen.