Urtxintxa eskolaren eskutik, Udaberriko Munduko artistak izeneko udaleku irekien formatua duen egitasmoa debalde jarri du udalerriko familien esku.
Legutioko Euskara eta Kultura teknikari Estitxu Iturratek azaldu du programa horren bidez "euskara, sormena, parte-hartzea, elkarlana, kulturartekotasuna eta gorputz adierazpena" jorratuko direla bereziki.
Saioak martxoaren 29tik apirilaren 1era izango dira, 10:00etatik 14:00etara bitartean, Legutioko kultura etxean.
Egun horietan askotariko ekintzak izango dituzte haurrek, hala nola, ezagutza eta konfiantza jolasak, dantza afrikarrak, mural sortzaileak, margotzearekin esperimentazioak edo stop-motion gorputz eraikuntzak.
Bi talde
Iturratek gaineratu du adin tarte handia dela kontuan hartuta bi talde osatuko direla; hain zuzen, txikien eta handien taldeak. 10 eta 12 umeko arteko talde bakoitzean hezitzaile bat egongo dela ere esan du teknikariak.
Interesatuek astelehenera arte, hilak 14, dute izena emateko aukera, liburutegian, udaletxean edo kultura@legutio.eus helbide elektronikoan.