alea.eus

Armentia-2 putzuaren lanak esleitzen hasi direla salatu du Berriztuk

Erredakzioa 2016-12-13 13:05   Ingurumena  Gasteiz

Eusko Jaurlaritzak Ingurumen Ebaluazioa oraindik tramitatzen ari denean argitaratu du iragarkia.

Armentia-2 putzuaren lanak esleitzen hasi direla salatu du Berriztuk
Subilla-Gasteiz putzua. | Ikusi handiago | Argazki originala

Berriztu mugimendu berriak adierazi bezala, Eusko Jaurlaritzak, Euskadiko Hidrokarburoen Erakunde Publikoaren (SHESA) bitartez, lizitazio iragarkia argitaratu du Euskal Herriko Agintaritzaren Aldizkarian, "Armentia 2 izeneko hidrokarburoen esplorazioaren zundaketan zulaketa egiteko, iraupen laburreko probak egiteko eta, hala badagokio, osaketa gauzatzeko zerbitzuez eta beharrezko materialez hornitzeko".

Iragarki honen aurrean, Berriztuk bere kezka agertu du. Batetik, lizitazio hau proiektuaren Ingurumen Inpaktuko Ebaluazioa garatzen ari den bitartean argitaratu delako. "SHESAk proiektua bere horretan onartuko diotela uste duela adierazten du horrek, bestela ulertezina da momentu honetan aurre kontsulta fasean dagoen txostena izatea lizitazioek oinarri gisa hartzen duten dokumentua". Hala, plataforma berriak ohartarazi du "nahikoa informazio jasotzen ez duen eta zaharkituta egongo den dokumentu" batean oinarrituko litzatekeela martxan dagoen lizitazioa. berauek aurkezteko epea atzo, abenduaren 12an amaitu zelarik. "Hau guztia BEZa kontuan hartu gabe, 27 milioi euroko aurrekontua duen proiektu bati buruz ari baikara", gaineratu dute ohar baten bidez.

Beste alde batetik, lizitazioarentzat aukeratutako kontratazio motan jarri du arreta Berriztuk, hots, prozedura negoziatuan, hain zuzen ere. Izan ere, prozedura "azkarragoa eta ezkutuagoa" dela salatu du.

"Eusko Jaurlaritza presaka dabil bere zulatze planak garatzeko eta parte hartzea alde batera uztea edo prozedurak bata bestearen gainean tramitatzea pagatu beharreko ordainsariak dira estrategia horretan". Horren aurrean,  Berriztuk baimen horien tramitazioak bertan behera uzteko eskatu dio Jaurlaritzari.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa