Tokiko Gobernu Batzarrak ‘Karbono maila txikiko ekonomia kostuak aurrezteko’ programaren 2016ko deialdia onetsi du gaur, enpresei energia-gastua eraginkortasun handiagoz kudeatzen laguntzeko. Programa 2015ean jarri zen martxan, 10 enpresatan, eta aurten 15 enpresatara zabalduko da, lehen edizioko emaitzak onak izan baitziren: parte hartu zuten enpresak energia fakturan % 12 aurrezteraino iritsi ziren.
'Karbono maila txikiko ekonomia kostuak aurrezteko' programak doako aholkularitza espezializatua ematen die enpresei, bost hilabetez, eta besteak beste, honako alderdi hauek barne hartzen ditu: Energia-kontsumoaren azterketa, karbono-aztarnaren kalkulua eta kontsumoak murrizteko eta energia kostuetan aurrezteko proposamenak.
Iaz, % 12 aurrezteraino iritsi ziren
Aholkularitza horri esker, iaz parte hartu zuten 10 enpresetan tarifa energetikoa, kontratatutako potentzia eta fakturazio irregulartasunak berraztertu ziren, eta kontzeptu horretan % 12 aurrezteraino iritsi ziren. Elektrizitate kontsumoaren kurbei buruzko informazioa ere jaso zuten, jasangarriagoa izan dadin, eta energia-eraginkortasunerako politikak hobetzeko neurri zuzentzaileen berri ere eman zitzaien.
Programa 2016ko deialdia ALHAOn argitaratu ondoren, 30 egun naturaleko epea izango da eskabideak aurkezteko.