Gasteizko Udalak 84.000 euro inbertituko ditu Gasteizen euskara sustatzeko. Gaur goizeko bileran, Tokiko Gobernu Batzarrak Euskaltzaindiarekiko lankidetza hitzarmena sinatzea (60.000 euro) erabaki du, eta Gazte Sortzaileak lehiaketaren deialdia (18.000 euro) eta Gasteizko dendetan euskararen presentzia eta erabilera sustatzeko diru-laguntzetarako deialdia (6.000 euro) onetsi ditu.
Euskaltzaindia
Hizkuntza arloko aholkularitza eta Gasteizko udalerriko toponimia lantzeko proiektua izango dira hitzarmenaren helburuak. Zehazki, Arratzua II liburukia argitaratuko da. Udalak eta Euskaltzaindiak 1996an sinatu zuten lehen lankidetza-hitzarmena.
Gazte sortzaileak
Gazte Sortzaileak beka deialdia onetsi da gaurko bileran eta honen bidez, gazteek datorren ikasturtean sortutako kultur proiektuetarako bekak emango dira; deialdia egiten den bigarren urtea da. Horretarako, Gasteizko Udalak 18.000 euro jarriko ditu.
Euskara dendetan
Hiriko dendetan euskararen presentzia eta erabilera sustatzeko diru-laguntzetara 6.000 euro zuzenduko ditu udalak. Laguntza horiek establezimenduetan kanpoko errotulazioa aldatu eta izenetan euskara sar dezaten erabiliko dira, eta dendetan euskararen presentzia eta erabilera sustatzearekin lotutako beste gastu batzuei laguntzeko.