Asteak zeramatzan beltzez margotuta, murala margotzeko prest, Salburua Bulebarra kaleko 9 eta 11 zenbakien arteko lonjaren paretak. Gaur iritsi zaio kolorez betetzeko eguna: auzoko Sarburu euskara elkarteak horma-irudia margotu du goizean zehar, "Salburuan euskaraz bizi nahi dugu" lelopean.
Behin amaituta, margolanaren inaugurazioa ospatu dute bertartutako hirurogei lagun inguruek; txistulariek girotuta, topa egin dute, eta ondoren inaugurazio-zinta moztu du Sarburu elkarteko Aritz Sukia kideak: "Modu xumean bada ere, Salburua auzoan euskararen alde lanean dihardugu Sarburu elkartean, urrats txikiak eginez; eta gaurkoa urrats horietako bat da", adierazi du.
Adin guztietako auzokideak eta Gasteizko beste txoko batzuetako euskaltzaleak bildu dira horma-irudiaren estreinaldian; udal-gobernutik, Iñaki Prusilla kultura-zinegotzia bertaratu da, eta auzo-elkartetik, Joseba Martinez de Guereñu.