Material birziklaezinaren zati bat eraldatu eta hondakinetatik erregai bihurtzea lortu du ontziak sailkatzeko eta bereizteko Jundizko lantegi batek eta lehena izan da Estatuan hori lortzen duena. Lantegia Arabako Foru aldundiarena da eta bertan, 428.747 euroko inbertsioa egin eta teknologia erabat berria ezarri ondoren, energia eraginkortasun handiagoa lortu du, eta “ingeniaritza jasangarrian erreferente” bihurtu da, atzo Ramiro Gonzalez ahaldun nagusian egin zuen bisitan adierazi zuen moduan. Zehazki, zoru bero-emailea jarri dute lantegiaren azalera batean eta horrek birziklatu ezin izan diren hondakinak lehortzea ahalbidetzen du. Ondoren, material hori birrindu eta trinkotu egiten da.
% 32 material birziklaezina
2015ean, guztira 3.193 tona ontzi (latak, tetrabrikak eta plastikozko botilak, besteak beste) birziklatu ziren lantegi honetan. Nolanahi ere, edukiontzi horira botatako hondakinen % 68 soilik izan ziren ontziak. Hau da, lantegi honetara iritsi zen material birziklaezina % 32 izan zen. Horregatik, Gonzalezek adierazu zuenez, "beharrezkoa da aurrerantzean ere arabarrek ahalegin handiagoa egitea, hots, ontzi kontsumoa murriztea, halakoak berrerabiltzea eta birziklatzea".