Gasteizko zaindaria den Andre Maria Zuriaren eskultura polikromatua kontserbatzeko eta zaharberritzeko lanak abian jarri dira eta hurrengo hilabeteotan, adituek lan hau nola egiten duten ikusteko aukera izango dute herritarrek. Lehenengo bisita martxoaren 4an izango da eta uztailera bitartean luzatuko dira. Ondoren, San Miguel elizara eramango dute eskultura.
XIV.mendeko eskultura
Estilo gotikoko eskultura da, XIV. edo XV. mendekoa, handia (214 x 69 x 54 cm) eta kareharri polikromatuz egina. Hasiera batean San Miguel elizaren atari nagusiaren egon zen. XVI. mendean elizaren sakristiako atzeko aldeko kontrahorma batera eraman zen eta XVIII. mendean berriro jarri zen kanpoko fatxadan.
Zuen kokapenak sortzen zituen zaintza arazoak zirela eta, Arabako Foru Aldundiaren Zaharberrikuntza Zerbitzura eraman zen 2007an, eta haren ordez erreplika bat jarri zen babestutako horma hobi batean. Egun narriatuta du egitura, garrantzizko pitzadura eta arrakalak ditu. Hala, esku hartzearen helburu nagusia eskulturari erasaten dioten narriadura arriskuak egonkortzea da.
Lanak IPCEren zuzendaritza teknikoaren eta Arabako Foru Aldundiaren Zaharberrikuntza Zerbitzuaren gidaritzapean egingo dira. Kultura Ministerioak finantzatu ditu lan horiek Kultura Ondarearen Institutuaren bidez, zazpi hilabete emango dira haiek egiten eta 52.359,12 euroko kostua izango dute.
Bisita egiteko
Bisita egiteko egunak: martxoaren 4a eta 18a, apirilaren 1a, 15a eta 29a, maiatzaren 13a eta 27a, ekainaren 10a eta 24a eta uztailaren 8a eta 22a.
Eguna eta ordua hitzartzeko, deitu 945-18-20-50 telefonora edo bidali mezu bat helbide elektroniko honetara: restauraciones@araba.eus