Txalo zaparrada batekin, Iban Zaldua idazleak eta Zuriñe 'Txiki' ekintzaile feministak Argia saria jaso dute Gora Gasteiz mugimenduaren izenean, gaur arratsadean Usurbilen izandako ekitaldian. Sustapen Ekintza onenagatik eman diote saria mugimenduari, "aniztasunaz gozatzeko deia zabaltzeagatik".
2014ko urte amaieran sortu zen Gora Gasteiz, etorkinak eta iruzurra lotzen zituzten mezuei aurre egiteko eta hirian elkarbizitzaren eta aniztasunaren aldeko jarrerak sustatzeko. Esker onez agertu dira ekimeneko sustatzaileak, eta sare sozialetan Gasteiz hiria zoriondu dute: "Zorionak, Gasteiz. Zuena baita meritu guztia. Gasteizez Harro. Orgullo de Ciudad. Stop Racism".
Beste sari batzuk ere banatu ditu Argiak:
- Prentsa idatziko saria: Joxerra Senar, Berriako kazetaria, CAN eta hemen ez da ezer gertatu liburuagatik.
- Ikus-entzunezkoen arloan: Hiru Damatxo ideia faktoriaren Gure Bazka saioa.
- Interneteko saria: Azpitituluak.com webgunea.
- Irratiko saria: Euskal Irratien Goiz Berri irratsaioa.
- Merezimenduzko saria: Loreak filma.
Argia-ko zuzendari Estitxu Eizagirrek adierazi du euskarazko hedabideentzat "eguneroko erronka" dela bizirik irautea, baina biziraute hori gainditu eta "auzia emateko" ordua dela nabarmendu du: "Irautea ez zaigu aski; bizi egin nahi dugu".
Argia.eus atarian argitaratu dute sari-banaketaren berri.