Finantzen Euskal Kontseiluan iragan urrian adostutako aurreikuspenen arabera, 2016. urtea amaitzeko 2015. urtean baino %3,1 gehiago bildu behar zuen Arabako Ogasunak, 2.054 milioi euro hain zuzen ere. Azkenean, 2.041 milioi eurotan geratu da diru-bilketa, 13 milioi gutxiago.
Aldundiak adierazi duenez, “aurreikuspenak bete egin dira Araban kudeatzen diren tasei dagokienez” (zuzeneko zergak eta kudeaketa propioko BEZa), baina ez da berdin gertatu “estatuaren eta EAEko gainerako aldundien doiketak aplikatu ostean”. Behin doikuntza hauek egin ostean, hazkundea %2,4koa izan da.
Gehien hazi direnak
Gehien hazi diren zergen artean, Pertsona Fisikoen Gaineko Zerga dago, “% 6,62 hazi baita, hau da, 39 milioi gehiago bildu dira tributu horren bitartez”. Hala, norberaren lanaren gaineko atxikipenak ia %4 hazi dira (27,6 milioi euro gehiago), eta, “horrenbestez, berretsi egiten da enplegu tasak egonkortu direla Araban”. Hazkunderik handiena errentaren gaineko zergaren kanpainan jazo da; “2015ean baino % 36,7 gehiago bildu da”.
Bestalde, ondarearen eta fortuna handien gaineko zergaren bidez %3,5 gehiago bildu da, eta sozietateen gaineko zergaren kanpainetan ere pixka bat gehiago bildu da (% 1,28).
Nabarmena izan da, Aldundiaren esanetan, kudeaketa propioko BEZaren bidez bildutakoaren igotzea (% 3,46). “Araban esportazioak nabarmen hazi diren arren, eta, beraz, zerga bilketan urritze bat izan den arren, Ogasunak lortu du aurreko urtean baino 14 milioi gehiago biltzea, eta horrek adierazten du kontsumoak eregora egin duela Araban”.