Gasteizko jaiak direla eta, hiriburua eta Arabako Errioxa eta Aiaraldea arteko autobus zerbitzua areagotu egingo dute, iazko eskaintzak izan zuen arrakastaren ondoren.
Aldundiak jakinarazi duenez, abuztuaren 4tik 7ra Gasteiztik Logroñora doan 9 lineak bi, hiru edo lau zerbitzu gehiagio emango ditu; honek Arabako Errioxako herri askori ematen dio zerbitzua. Eta Gasteiztik Harora doan 12 lineak, berriz, sei zerbitzu gehiago emango ditu norabide eta egun bakoitzean.
Gasteiz eta Aiaraldea artean ere garraio aukera gehiago izango dira hurrengo egunetan. Gasteiz eta Izarra lotzen dituen 14 lineak eta Gasteiz eta Amurrio eta Laudio lotzen dituen 15 lineak zerbitzu gehiago emango dituzte; hain zuzen ere, normalean ematen dituztenak baino zerbitzu bat, bi edo hiru gehiago norabide bakoitzeko.
Zerbitzu berriei buruzko informazio guztia Aldundiaren web orrian (www.araba.eus/alavabus) ikus daiteke.