Trebiñu, lege organikoaren bidez, Araban integratzen den edo ez erabakitzen den arte trantsizio hitzarmena egiteko eskatu du Trebiñuko Konderriko Udalbatzak, "biztanleek ezinbestekoak dituzten zerbitzuak eskaintzeko eta kudeatzeko ditugun arazoak konpontze aldera".
Udalbatza maiatzaren 20an bildu zen, eta bertan onartu zuen trantsizio hitzarmen orokorra bultzatzea; horretan parte hartu beharko lukete Gaztela eta Leongo Juntak, Eusko Jaurlaritzak, Burgosko Diputazioak, Arabako Foru Aldundiak eta Trebiñuko udalek.
Lehentasunak
Halaber, hitzarmen horretan bildu behar diren lehentasunezko zerbitzuak zerrendatu ditu Udalak: herritarren babesa eta larrialdi zerbitzuak, osasuna, hezkuntza, euskararen koofizialtasuna, garapen plan estrategikoak, zerbitzu sozialak eta inbertsioak. Zerbitzuen finantzaketa Gaztela eta Leongo Juntari dagokiola jaso du Trebiñuko Udalak.
Bestalde, Udalak onartu duen testuaren arabera, ekainean sinatu beharko da trantsitsio hitzarmena, eta Trebiñuren integrazioari buruzko lege organikoa Espainiako Kongresuan eztabaidatu arte iraungo du.