Lehenengo bisitariak agertu dira dagoeneko. Beroak gora egiten duenean, eltxo, txitxiburduntzi eta sorgin-orratz ugari ikus daitezke aintziran, eta haiek harrapatzeko hegaldi akrobatikoetan, enara espezie ezberdinak eta sorbeltzak. Ez nintzateke harrituko udazken aldean beste bisitari ilustratuago batzuk agertuko balira (erlatxoriak adibidez), aintzira bazkalekutzat hartuta, alde bateko sahats-lerro ederra atalai moduan erabilita.
Irudia: Bisitari batek ahaztutako pijama
Momentuz agertu dena txirritxo txiki bat da (Charadrius dubius). Tamalez, jendearen eman handiak eta txakurren joan-etorri etengabeak txirritxoaren bakea zapuzten dute, eta alde batetik bestera urduri ikusiko duzue nora jo oso ongi ez baleki bezala.
Irudia: “Txirritxo txikia”
Horrek, baina, ez du konponbide zaila, nahikoa litzateke-eta, nire ustez, pasealekuko bidezidorretatik urrutien gelditzen den aldean oinezkoen pasaera debekatzea. Ibilzalearentzat ez litzateke traba handia izango, eta a ze bakea han babesten diren hegaztientzat! Proposamena bota dut, baina seguru nago CEAko lagunak txoko honen jarraipen zorrotza egiten ari direla eta asmatuko dutela zer egin.
Egilea: Martin Rezola