Soziolinguistika klusterrak 
Izan ere, erabilera-indizean ia ez da aldaketarik antzeman 1993az gero. Hortaz, “ez atzera ez aurrera dago euskararen erabilera”. Arabari dagokionez, ez da «aldaketa esanguratsurik» gertatu azken hamarkadetan eta %4koa da euskararen erabilera gure lurraldean. Gasteizko joera antzekoa izan da; 2006a bitarte goranzko joera apala izan du erabilerak, eta azken bost urtean zertxobait behera egin du. Euskararen ezagutza gure hirian %25 ingurukoa da , ikerketak jaso duen erabilera, berriz, % 3 ingurukoa.
Halarik ere, hizkuntza-aniztasuna gure kaleetan gero eta presenteago dagoela agerian utzi du ikerketa honek eta Gasteizen (baita Bilbon eta Irunean ere), beste hizkuntzak euskara baino gehiago erabiltzen dira. Beste hizkuntza horiek, euskarari ez ezik, gaztelaniari ere eragin diote. Horrela, gure kaleetan entzuten diren elkarrizketen %3,1 dira euskaraz, %4,7, aldiz, beste hizkuntzetan.
Adin-taldeei erreparatuz, Araban, helduetan erabilera egonkor dagoela nabarmendu du ikerketak. Beste irudipen bat ere berretsi du neurketak: haurrekin maizago egiten dela euskaraz. Araban datu esanguratsua utzi du kale neurketak: haurrek beren artean eginiko elkarrizketen %2,1 dira euskaraz; helduen artekoetan, %2,4 dira; orain, haurrak eta helduak nahasten diren elkarrizketetan, euskarazkoak dira %7,6.
Azkenik, emakumezkoek gehiago egiten dute euskaraz gizonezkoek baino adin-talde guztietan, adinekoetan izan ezik.
Olatz Altuna Soziolinguistika Klusterrekoak, Xabier Isasi EHUko irakasleak, Iñaki Iurrebaso soziologoak, Iñaki Martinez de Luna EHUko irakasleak eta Rosa Ramos Berriozarko euskara teknikariak osatu dute ikerketa hau aurrera eraman duen Batzorde Zientifikoa.
Ikerketaren emaitza guztiak HEMEN