Iazko Fukushimako istripu larriaren ondoren, nuklearren kontrako jarrera hedatu zen herritarren artean, izan ere, Txernobilgo ezbeharraren ostean, inoizko larriena izan zen. Eragin zehatza zein izango den jakiteko goiz den arren, zazpi mila bat lagun erradiazioa handiaren eraginpean egon ziren eta, besteak beste, kutsadura garbitzeko lanak 25 urtez luzatuko dira.
Gure herrialdean ere hamaika izan dira Santa Maria de Garoñako zentral nuklearra ixteko eskariak. Adibide bat jartze aldera, azken aldarria martxoan 24 eman zen Gasteizko Ogeta pilotalekuan. Araba Garoñarik Gabe plataformak 228 elkarte eta talde batu zituen egindako ekitaldian: enpresa batzordeak, sindikatuak, kultur taldeak, kontzejuak, gizarte mugimenduak… Espainiako Gobernuari Garoña 2019 urtera arte zabalik mantentzeko arrazoi ekonomikorik ez dagoela gogorarazi zioten. Aldi berean, Arabako jendartea haren kontra dagoela adierazi eta luzapenaren kontra egin dezaten eskatu zioten euskal instituzioei.
Garoña zein Fukushima urte berean jarri zituzten martxan, 1971n. Biek teknologia eta sistema bera eta antzeko potentzia zuten komunean. Espainiako Gobernuak, aldiz, Fukushimako istriputik ikasi beharrean, Garoñako zentral nuklearraren bizitza 40 urtetik gora luzatzeko erabakia hartu du, nahiz eta jendartea kontra dagoen badakien. Aurreko legealdian PSOEk zentrala 2013ko ekainean itxi egingo zuela esan bazuen ere, datorren urteko ekainean ez da halakorik emango; PPk 2019 urtera arteko baimena ematearen alde azaldu baitzen hauteskundeak irabazi eta gutxira. Urte luze hauetan, Garoñak hamaika arazo tekniko izan ditu hozte sisteman, suteak eragozteko sisteman eta kontrol sala isolatzeko sisteman, eta egiturazko beste hainbat ere bai. Azken arazoa martxoan eman zen, karga jaisteko maniobra batean akats bat eman eta programatu gabeko beste geldialdi bat izan zuen. 2006tik Espainiako Estatuko zentralik zaharrena da.
Egilea: Zuriñe Etxeberria @Zurinetxeberria
Argazkia: Iera Larrabeiti
2012/05/07